لەیادی ۳۱ ساڵەی ڕاپەڕین دا 

هەرێم و داهاتەکەی موڵکی ئەو کەمینە خۆسەپێنە سیاسییە نییە کە بەرهەمی قوربانیدانی خەڵکیان بردووە!  

خەڵکی کوردستان ۳۱ ساڵ لەمەوبەر لە شاری ڕانیەوە دژی زوڵمی بەعس ڕاپەڕی و هەموو کورستان ئازاد کرا، پاش سەدەیەک خەبات و تێکۆشان و قوربانیدان بە هەزاران شەهید، بەناوی ئەنفالەوە جینۆسایدو کیمیایی باران کراین، لەڕاپەڕین دا بوین بەخاوەنی حکومەت و پەرلەمان و 

هەرێمێکی ئازاد، پاش لەناوچونی ڕژێمی بەعس و سەدامی دیکتاتۆر، لەدەستوری عێراق بوین بەخاوەنی هەرێمی کوردستان لەعێراقی فیدراڵ. 

بەڵام بەداخەوە بەهۆی خراپ بەکارهێنانی دەسەڵاتەکانی حوکمڕانی و گەندەڵی و پێشێلکاری مافەکانی مرۆڤ و بەکارهێنانی دەسەڵاتی دادوەری لەپێناو سەرکوتی ئازادی نمونەیەکی ناشیرینی حوکمڕانی پێشکەش کرا.

لەمڕۆدا کەیادی ۳۱ ساڵەی ڕاپەڕین دەکەینەوە خەڵکی کوردستان بەخراپترین دۆخی ئابوری و کارگێڕی و کۆمەڵایەتی دا گوزەر دەکات.

هەژاری زیادی کردووە، بێ کاری زۆر بووە، حکومەت رۆژانە نیو ملیۆن بەرمیل نەوت دەفرۆشێ بەڵام موچەی فەرمانبەران نادات، نرخی سوتەمەنی دوو هێندەی عێراقە کارەبا ٦ کاتژمێر هەیە . 

بەداخەوە بەرهەمی خوێنی شەهیدەکانمان و بەرهەمی قوربانیدانی میلەتەکەمان کرا بەگەندەڵی و لاوازکردنی هەرێم و حوکمڕانیەکی خراپ، بەهیواین ئێوە لەعێراق جیاوازی بکەن لەنێوان کەمینەیەکی سیاسی کەدەستیان بەسەر دەسەڵات و داهاتی هەرێم دا گرتووە لەگەڵ خەڵکی کورستان کە ئەو جۆرە حوکمڕانییە ڕەد دەکەنەوە. 

هەرێم و داهاتەکەی موڵکی خەڵکە نەک ئەوانەی ئەمڕۆ حوکمی هەرێم بەوجۆرە دەکەن.